自己腌制咸柑桔
唔经唔觉，今日就系正月十五元宵佳节，农历新年话咁快就过了！年三十行花巿买了盆四季桔，现在都唔知点算好，丢了佢又有好似好嘥咁。同公司花王倾开偈，佢话唔使愁，四季桔最啱腌制咸柑桔，加温水或蜜糖饮可解渴。
花王话，制法好简单，剪咗啲柑桔，唔要枝叶，再用热水冲干净桔，跟住用猛火蒸五、六分钟，再放入玻璃樽入面腌。不过，腌柑桔都有技巧，首先喺玻璃瓶底铺一层粗盐，先好放一层柑桔，再加一层盐冚住。就系咁一层柑桔，一层盐到装满整瓶后密封，放喺阴凉嘅地方腌制至少半年。
花王又话，一 些桃花、菊花、年桔叶都可以用嚟做干花，扎成一束放喺衣柜辟味。呢排咁干燥，放埋一堆自然风干就用得嘞。
香港中医师公会会长关之义话，饮咸柑桔水系有除痰润肺、清热下气嘅效果，特别系对医喉咙痛、燥热等病症有效，「但本身体虚或者有风寒，就唔好饮咁多嘞。」
